• Frjálshyggjumenn eru ekki allir nöttarar (ekki allir sammála mér um það)
• Frjálshyggjumenn aðhyllast ekki allir samsæriskenningar
• Frjálshyggjusamsærisgaurar eru ekki endilega rasistar, fasistar eða nasistar.

...og öndum hægt og rólega frá okkur.

Geir, Glúmur, Sigríður, Frosti og Frosti, Erna Ýr, Arnar Ar og Arnar Þór, Almar Örn, Guðmundur St, Bjarki, Þórður, Skúli, Kristján, Addi, Andri... Listinn er svo langur að það er ekki nokkur leið að taka hann saman enda er það aukaatriði. Þá vantar auðvitað herskara nafnlausra aðganga sem aðhyllast sömu hugmyndir og tengjast oft innbyrðis og tilteknum nafngreindum einstaklingum.

Hvers vegna fjalla ég um frjálshyggjusamsærisliðið í greinaflokk (ef ég má nota það orð) um nasista, fasista og fylgjendur þeirra?

Ég var einu sinni frjálshyggjumaður (og nörd)

Kommon, ég ólst upp í Garðabæ og gekk í Verzló. Mér var ekki viðbjargandi, auðvitað studdi ég Sjálfstæðisflokkinn og aðhylltist ýkta frjálshyggju, einkaframtakið bætir (allt) og kætir (alla).

Tíminn leið, hann getur ekki annað, ég óx úr grasi, þroskaðist eitthvað og vanþroskaðist dálítið á móti líka, og flestar skoðanir mínar breyttust eða þróuðust. Suss, ég er ekki að segja að það sé merki um vanþroska eða skort á lífsreynslu að aðhyllast harða frjálshyggju þó það mætti stundum halda. Mér finnst reyndar oft skrítið þegar fólk hefur aldrei skipt um skoðun á nokkru á fullorðinsaldri.

Ég held ég geti sagt að ég sé nokkuð vinstrisinnaður en sósíalistarnir (úr Sósíalistaflokknum) sem elska mig ekki, kalla mig "libba" og finnst fátt hræðilegra, ekki einu sinni öfgafrjálshyggjufólk! Ætli mætti ekki kalla mig einskonar krata, félagshyggjumann með jákvæð viðhorf til einkareksturs á flestum sviðum og með mikla andúð á dólgakapítalisma, Evrópu- og alþjóðasinnaður. Er hlynntur innflytjendum og fjölmenningarsamfélagi, en aðhyllist ekki hugmyndir um engin landamæri.

Ég átti ágæt samskipti við einhverja frjálshyggjumenn á Twitter þó við værum ekkert sammála um allt, eflaust voru þeir dálítið ánægðir með mig meðan ég baunaði á Eflingarforystuna (hóp sem ég er enn ósammála um margt), en einhvern vegin tókst mér að missa þá flesta, sennilega þegar ég brást furðu lostinn við sumum tvítum. Þeir hættu að fylgja mér einn af öðrum og ég varð í alvöru dálítið leiður inni í mér. Það sama gerðist með nokkra róttæka vinstrimenn, suma sem ég hefði kallað vini eða kunningja. það væri barnalegt að líta ekkert í eigin barm en hver er ég að afneita mínu innra barni? Þetta er öllum öðrum að kenna!

Ég er semsagt að reyna að koma því frá mér að ég hef alveg getað átt samskipti við fólk sem ég er ekki sammála og geri engar kröfur til þess að allir hafi sömu skoðanir og ég. Þar til mjög nýlega blokkaði ég enga á Twitter.

Samsæriskenningar og covid

Svo kom covid og þá virtust, frá mínum bæjardyrum séð, ansi margir frjálshyggjumenn finna sér nýtt áhugamál og nýjan persónuleika. Skiljanlega brást þessi hópur afar illa við takmörkunum á frelsi borgara, annað væri úr takti við hugmyndafræði þeirra. Það þýðir ekki að eðlilegt sé að stökkva skyndilega á allar jaðarkenningar sem í boði eru, eyða næstu árum í að útvarpa næstum eingöngu slíkum kenningum og láta eins og vísindasamfélagið sé að stóru leyti partur af einhverju trylltu samsæri.

Árásin á Tvíburaturnana í New York 11. september 2001 varð upphafið að ótrúlega lífseigum samsæriskenningum og fólk sem aðhylltist ekki ýktustu kenningar tók jafnvel undir einhverjar vægari útgáfur. Það lenti stundum á mér að deila við fólk um það. Ekki láta ykkur dreyma að ég ætli að rökræða samsæriskenningar hér og nú, grínlaust, ég mun bara eyða athugasemdum um 9/11.

Covid

Covid kom, fólk dó og skynsömum manneskjum þótti ástæða til að bregðast við. Það er nefnilega frekar óheppilegt þegar margt fólki deyr, eða það finnst okkur libbunum! Auðvitað má deila um það eftirá hvort hin og þessi ákvörðun hafi verið rétt, það er auðvelt að vera vitur eftirá. Sannarlega voru gerð mistök og ýmislegt sem ákveðið var snemma í covid reyndist rangt, t.d. áherslan á snertismit en ekki loftgæði og grímunotkun eins og Frosti Sigurjónsson benti réttilega á, en fólk tók ákvarðanir út frá þeim upplýsingum sem það hafði og aðstæðum sem þá voru. Annað er nefnilega ekki hægt, tíminn gengur nefnilega áfram eins og ég nefndi áður. Það er líka dálítið skemmtilegt að rifja upp að hugtakið "fasisti" var töluvert notað af frjálshyggjusamsærisnötturum á þessum tíma.

Uppúr mótlætinu sem covid aðgerðir voru gengu fjölmargir frjálshyggjusamsærisnöttar af göflunum, gerðust á einni stundu alvitrir um sóttvarnir, sem þeim þóttu tilgangslausar og bóluefni sem þeim þykja hættuleg. Fólk sem ég hefði áður talið nokkuð skynsamt var skyndilega farið að daðra við hugmyndir um að sjúklingar, aldraðir og annað viðkvæmt fólk gæti bara drifið sig að drepast til að við hin þyrfum ekki að taka á okkur meiri kostnað og óþægindi.

Þegar búið var að bólusetja flesta landsmenn og aflétta öllum takmörkunum tók við endurskoðun sögunnar og nýlega hefur sumt af þessu fólki dregið þá ályktun að fyrst veikum hafi fjölgað eftir að sóttvarnaraðgerum var hætt hafi lítill tilgangur verið með þeim, sem er furðulega öfugsnúin röksemdafærsla! Sífellt er vitnað í að Svíþjóð hafi staðið sig þjóða best og margir á því að allt hafi þetta verið algjört leikrit, covid ekkert verra en slæmt kvef og flest fólk muni jú deyja að lokum, þetta sé því stormur í vatnsglasi.

Ég bloggaði fyrir tveimur árum.

• Sjálfstæðisflokkurinn, covid og Trumpismi

Einu sinni tengdi ég flestar samsæriskenningar við fólk langt til vinstri, fyrir utan þá sem ekki trúa á Þróunarkenninguna, sem voru og eru (kristna) hægra megin. Nýöld og samsæri voru kokteill. Síðustu ár hefur þetta algjörlega snúist við og langflestir sem aðhyllast samsæriskenningar opinberlega eru frjálshyggjumenn. En það má líka segja að nú sé uppskriftin að kokteilnum breytt; nýöld, frjálshyggja og samsæri. Með dassi af rasisma stundum.

Reglulega gera þeir samt lítið úr slíkum ásökunum, vísa á bullgreinar og segja eitthvað í átt við; „á ekki bara að kalla allt samsæri“. Svarið er óþægilegt of já, þetta sem þú ert að fjalla um núna er samsæriskenning, það tekur 30 sekúndur að staðfesta það.

Uppruni covid

Hugmyndir um uppruna covid eru ágætt dæmi um það hvað umræðan getur verið flókin. Vissulega voru uppi kenningar (ekki samsæris-) um að covid hefði orðið til á rannsóknarstofu. Vísindamenn skoðuðu þá kenningu ásamt kenningu um náttúrlegan uppruna og komust að lokum að því að nær útilokað væri að covid hefði orðið til á rannsóknarstofu og allt benti til að covid hefði borist frá dýrum í menn. Auðvitað tjá vísindamenn sig varlega og útiloka helst ekkert fyrr en þeir hafa öll gögn. Þannig er hægt að vitna í Fauci sem útilokaði þetta ekki, því það var verið að skoða málið.

Það var ekkert að því að aðhyllast kenningu um leka af rannsóknarstofu, en þegar niðurstöðu liggja fyrir, er það orðin samsæriskenning að halda sig við kenninguna.

• Wikipedia: COVID-19 lab leak theory
• LA Times: U.S. government debunks COVID lab-leak conspiracy theory, enraging conspiracy theorists
• msnbc: Those insisting the pandemic was human-made are ignoring the known facts

Kemur síðar í ljós að þetta var allt samsæri og Kínverjar hafa falsað gögn til að fela þá "staðreynd" að covid-19 á uppruna sinn á rannsóknarstofu? Það getum við ekkert vitað um núna, en í besta falli er hægt að segja að sú kenning byggir á afar veikum grunni í dag.

Ekki bara covid

Ef þetta væri bara covid væri staðan einföld en svo er bara alls ekki. Þessi hópur sem ég uppnefni sem frjálshyggjusamsærisnöttara hefur flestar af eftirfarandi skoðunum:

• covid er flensa, bóluefnin virka ekki og drepa fólk
• veðurfar jarðar er ekki að breytast
  • ef það er að breytast er það ekki af mannavöldum
  • ef það er af mannavöldum eru breytingarnar jákvæðar
  • annars er ekkert hægt að gera!
  • það sem við gerum dregur úr hagvexti
  • Olía er góð
• "Góða fólkið" eða "woke" liðið hefur alltaf rangt fyrir sér og því eru:
  • málefni trans-fólks bull og tilvera trans-fólks árás á konur og samkynhneigða
  • kynfræðsla á ekki heima í skólum
  • Jafnrétti kynja löngu náð, öll frekari barátta fyrir því bull
  • Allt sem gert er til jafna stöðu minnihluta, sérstaklega í Bandaríkjum (nú síðast DEI) er bull.
• Evrópusambandið er hrikalega slæmt reglugerðafargan (þó gaurinn búi í evrópusambandsríki)
• Rafmyntir, rafmyntir, rafmyntir (vita nær ekkert um bálkakeðjur, finnst samt að þær eigi að leysa allskonar leyst vandamál)
• Gervigreind, gervigreind, gervigreind (vita mjög lítið um gervigreind)
• Javier Milei er Jesús endurfæddur!
• Russel Brand, Alex Jones, Tucker Carlson, Joe Rogan, Jordan Peterson!
• Þeir elska Musk, finnst hann snillingur og þykjast aldrei sjá þegar Musk er í tómu rugli

(fólk getur samt aðhyllst eitthvað af þessu án þess að falla í flokk frjálshyggjusamsærisgaura)

Ég gæti skrifað alltof mikið um þetta og ein ástæða þess að það hefur tekið mig tíu daga að koma þessari bloggfærslu frá mér er að ég er með alltof mikið efni í höndunum, ég hef ekki tíma til að hafa þetta styttra! Ég ætla að fjalla um annað, þessi grein er bara útúrdúr, en þó ekki.

Musk og einsleitar skoðanir

Musk keypti Twitter, sagði upp flestu starfsfólki og ákvað að tjáningarfrelsi fordómafullra væri mikilvægasta frelsið. Lofaði að hætta allri ritskoðun/ritstýringu og viti menn, rasistarnir skriðu úr skúmaskotum (4chan).

Eins og ég sagði í fyrstu grein, brá mér þegar íslensku nasistarnir birtust allt í einu og hvað þeir eru margir. Það kom mér líka algjörlega í opna skjöldu þegar ég sá að frjálshyggjusamsærisgaurarnir hópast í kringum og eru viðhlæjendur þeirra. Mér finnst það grafalvarlegt. Kannski er hluti ástæðunnar að nasistarnir "stuða" woke/góða fólkið og allt sem stuðar "góða fólkið" er gott. Óvinur óvina minna.

Þegar níu einstaklingar sitja við borð og nasisti sest hjá þeim, og enginn stendur upp, þá sitja tíu nasistar við borðið. Hvað þá ef allir tíu hlæja saman. Sem er það sem hefur gerst á Twitter/X undanfarið.

Þess vegna fjalla ég um frjálshyggjusamsærisliðið í greinaflokk um nasista, fasista og fylgjendur þeirra.