Eins og fjölmargir karlar á mínum aldri fékk ég óvænt boð í AstraZene­ca bólusetningu seinnipartinn í gær. SMS barst 14:12, ég og Örvar vinnufélagi vorum mættir við Laugardalshöll hálftíma síðar og aftur í vinnu rétt rúmum klukkutíma eftir boð. Ástæðan fyrir þessu óvænta boði virðist hafa verið frekar slök mæting í gær, en ég kvarta ekki, þvert á móti, takk kærlega þið sem ekki mættuð! En drífið ykkur svo í bólusetningu fyrir okkur öll.

Það hafa svosem aðrir sagt það, en þessi framkvæmd á bólusetningum í Laugardalshöll er alveg stórkostleg. Hér er flott myndband af því

Heilsan hefur verið fín. Í gærkvöldi fann ég einhver einkenni og þegar ég lagðist í rúmið fann ég hitt og þetta að en ekkert alvarlegt. Vaknaði hálf sex í morgun með smá hita (37.7° munnmæli) en náði að sofna aðeins aftur. Skellti mér í vinnuna og er búinn að vera hress, ekki 100% en ekki heldur slappur.

Þá er bara að bíða eftir næsta skammti. Vonandi líða bara átta vikur á milli, ekki tólf.

Uppfært 20:20: ég er ekkert rosalega hress, ekkert rosalega slappur. Lagði mig seinnipartinn, svaf lítið. Enn með sama hita, dálítinn hausverk. Ég verð örugglega orðinn góður á morgun. Og svo varð ég örlítið aumur í stungustað seinnipartinn í dag.

Viðbót daginn eftir: vaknaði hress, búinn að jafna mig. Skoðaði svo hjartslátt og stress úr Garmin úrinu og það staðfestir að þetta er liðið hjá.