Það er alltof langt síðan ég hef rifjað upp dæmi um glórulausa "fræðimennsku" Bjarna Randvers Sigurvinssonar^*. Var að gefnu tilefni að fletta í gegnum greinargerð hans í kvöld og rakst á gott dæmi um það hvernig Bjarni vinnur. Dæmi sem ég tók ekki eftir við fyrri lestur.

Á blaðsíðum 90 og 91 í drögum að greinargerð sem Bjarni skrifaði og fjölmargir fræðimenn kvittuðu upp á að væri afar vandað verk fjallar Bjarni um að Vantrú bendi á að dæmin sem hann taki um orðbragð vantrúarsinna séu flest af öðrum síðum en Vantrú. Svo segir hann:

...allt eins er hægt að finna neikvæða orðræðu um nafngreinda einstaklinga á sjálfum vef félagsins, svo sem í formi hæðni og gífuryrða. Þannig kallar t.d. Matthías Ásgeirsson þar einn nafngreindan sjöunda dags aðventista hér á landi "trúarnöttara" og segir að maðurinn sé „"fársjúkur andlega" en orðfærið réttlætir hann á þá leið að

... ég skrifa móðganirnar allar undir fullu nafni.

Það er vissulega skrítin réttlæting á hæðni og gífuryrðum um nafngreindan einstakling að sá sem þau setur fram sé nafngreindur. En það er oft áhugavert þegar BRS styttir tilvitnanir vegna þess að hann á það til að sleppa hlutum sem skipta máli og breyta jafnvel algjörlega því sem við lesum úr textanum. Hér mætti halda að Bjarni Randver klippi bara út texta á undan tilvitnunni en í raun klippir hann líka út texta sem kemur á eftir.

Orð mín féllu við greinina Sköpunarsinnar, fársjúkt fólk sem ég skrifaði á Vantrú í kjölfar gríðarlega langra rökræðna milli mofa og meðlima í Vantrú (ég vísa á eina rökræðu í greininni, hlekkur á "mofi"). Í athugasemdinni svaraði ég mofa sem kvartaði (skiljanlega) undan móðgunum og persónulegum árásum. Ég sagði í lok athugasemdar minnar og feitletra hér það sem Bjarni sleppti úr setningunni.

"Þú getur huggað þig við það að hér kemur þú fram undir fullri nafnleynd en ég skrifa móðganirnar allar undir fullu nafni. Persóna þín ber því lítinn skaða af." #

Semsagt. Á þessum tíma, þegar ég skrifaði greinina á Vantrú var mofi ekki "nafngreindur einstaklingur". Hann var nafnlaus persóna, sköpunarsinni sem rökræddi af miklum krafti við okkur í Vantrú og tók engum rökum - það skipti aldrei máli þó líffræðingar og aðrir meðlimir Vantrúar reyndu að leiðrétta rangfærslur hans - hann kom alltaf aftur með sama bullið - algjörlega úti á þekju. Áratug síðar er blessaður maðurinn reyndar enn fastur í þessu rugli.

Það er það sem ég var að segja. Ég var, undir fullu nafni, að "drulla yfir" nafnlausan mann - gervipersónu. Það var ekki fyrr en síðar að mofi opinberaði hver hann er, varð nafngreindur sjöunda dags aðventisti. Orð mín áttu ekki við um nafngreindan mann því ég vissi ekkert hver þetta var.

Það er ljóst að Bjarni Randver var ekki að stytta tilvitnunina í mig útaf plássleysi í greinargerðinni eða til að auðvelda lesturinn, hann klippti athugasemdina í sundur til að gefa ranglega í skyn að ég hefði verið að tala illa um "nafngreindan einstakling" í grein á Vantrú. Bjarni Randver var að blekkja lesendur. Vissulega fylgdi vísun neðanmáls en Bjarni vissi að litlar líkur eru á að lesendur fylgi öllum vísunum, sérstaklega þegar þær eru gríðarlega margar. Ef hann hefði ekki klippt setninguna í tvennt og látið setninguna á eftir fylgja hefðu flestir lesendur séð að ásökun Bjarna var röng. Með svona vinnubrögðum er hægt að skálda hvað sem er!

Þetta eru dæmigerð vinnubrögð Bjarna Randvers. Þetta eru vinnubrögðin sem við kvörtuðum undan og dæmi eins og þetta úr greinargerðinni bentum við siðanefnd á þegar við fengum að mæta fyrir hana og kynna mál okkar. Síðasta siðanefndin sem fjallaði um málið gaf okkur aldrei færi á að kynna mál okkar og sá því aldrei gögn eins og þessi. Henni dugði að sjá gögn eins og þessa fáránlegu greinargerð. Upp á þessi vinnubrögð kvittuðu einhverjir fræðimenn. Megi þeir ávallt skammast sín - sérstaklega Guðni.

Það versta við þetta er að ég á nokkrar sambærilegar bloggfærslur eftir óskrifaðar - hef verið of latur/áhugalaus til að skrifa þær. Rakst á þetta núna og ákvað að skella í blogg.

^{* Fyrri bloggfærslur mínar um vinnubrögð Bjarna í greinargerðinni:}

• Akademískur "brjálæðingur"
• Klassísk frekja