Teitur Atlason vísaði einu sinni á bloggfærslu hjá Vigdísi Hauks. Þegar Teitur var svo að skoða eigin færslu nýlega virkaði vísunin ekki lengur. Teitur dró ranglega þá ályktun að Vigdís hefði eytt bloggfærslunni. Þegar honum var bent á mistökin í athugasemd játaði hann þau og breytti fyrirsögn færslunnar. Við getum öll gert mistök og það er gott þegar fólk viðurkennir þau.

Vigdís Hauks frétti af þessu og í stað þess að kynna sér málið og gera létt grín að mistökum Teits, t.d. með því að skamma hann fyrir að leita ekki á google, fór hún enn lengra í misskilningi og vanþekkingu á netinu og sakaði Teit um að falsa slóðir, fullyrti að bloggfærslan hafi aldrei verið á þeirri slóð sem Teitur vísaði á á sínum tíma.

En bloggfærslan var þar víst meðan Vigdís notaði Blogger til að hýsa vefinn sinn. Svo skipti Vigdís (eða sá sem sér um vefinn hennar) yfir í Wordpress kerfið og þá breyttust allar slóðir á blogginu hennar Vigdísar, dagsetningarparturinn féll út. Það er frekar algengt að þetta gerist þegar vefir eru uppfærðir og því miður er fólk alltof latt við að láta gamlar slóðir virka, t.d. með því að nota redirect. Slíkt er hægt að gera sjálfkrafa og þarf ekki að vera mikið mál, sérstaklega ekki í tilviki Vigdísar því breytingar á slóðum á hennar vef voru mjög "reglulegar".

Þannig að Vigdís eyddi engu og Teitur falsaði ekki neitt. Enginn stimplaði sig út.

Aftur á móti sýnist mér þörf á stjórnmálamönnum sem skilja internetið almennilega, netið er nefnilega engin bóla heldur fyrirbæri sem skiptir virkilega miklu máli. Á netinu eiga íslendingar viðskipti fyrir milljarða króna á hverju ári og á Alþingi íslendinga er kannski ein manneskja sem getur sagt mér hvað VPN, Tor, router eða redirect er.

ps. Er ég ekki hér með kominn í hóp þeirra sem leggja Vigdísi Hauks í einelti?