Ég missti af útvarpsprédikun síðustu helgar en las hana á netinu. Skemmtilegt að segja frá því að Stefán Einar Stefánsson guðfræðingur (sem stundum er titlaður viðskiptasiðfræðingur af einhverri ástæðu) og formaður VR flutti orð Drottins í Seltjarnarneskirkju á degi Biblíunnar. Kannski vegna þess að hann var forseti Hins íslenska biblíufélags áður en hann gerðist verkalýðsleiðtogi.

Náð sé með yður og friður, frá Guði föður vorum og Drottni Jesú Kristi. Amen.

Með þessum orðum hóf formaðurinn mál sitt.

Svo sagði formaður verkalýðsfélagsins meðal annars:

...þeir hafa notið þeirra forréttinda að skynja og jafnvel skilja að einhverju marki, hvað trúin og traustið til Guðs, hefur fært manninum. Í lexíu dagsins, þ.e. textanum sem lesinn var úr Gamla testamentinu hér áðan segir m.a.: Leitið Drottins meðan hann er að finna, ákallið hann meðan hann er nálægur. Og ástæðan að baki þessari áskorun er einnig gefin upp: Hinn guðlausi láti af breytni sinni og illmennið af vélráðum sínum, og snúi sér til Drottins svo að hann miskunni honum, til Guðs vors því að hann fyrirgefur ríkulega.

Að sönnu falla fæstir í flokk sannkallaðra illmenna en margir eru hinir guðlausu. Og öll eigum við það sameiginlegt að breiskleikar búa innra með okkur – enginn er þar undanskilinn. Vissulega eiga þeir sér ólíka birtingarmynd, þ.e. breiskleikarnir, og lestirnir hafa mis alvarlegar afleiðingar fyrir einstaklinginn og samfélagið.

Guðlausir félagsmenn VR, sem sennilega eru nokkuð margir, mega taka þessi orð til sín.

Trúin er okkur þess vegna mikilvæg stoð og raunar lífsnauðsynleg. Fyrst og fremst er það af tveimur ástæðum, annarri hinni fremri. Það er að trúin frelsar, fyrirgefur og leysir okkur undan oki syndarinnar. Hitt er það að trúin og þá sérstaklega Guðs orð, veitir okkur leiðsögn í hverjum þeim aðstæðum sem upp kunna að koma og beina okkur inn á þann veg þar sem við fáum það gert sem okkur ber, og hverfum frá því sem við eigum ekki að gera.

Svo mælti formaður VR. Megi félagsmenn njóta og taka til sín, þetta er nú frekar máttlaust.

Er ekki hálf galið að formaður verkalýðsfélags flytji útvarpsprédikun eða er það bara ég sem er galinn?