Mér þykir óskaplega leiðinlegt að fylgjast með þróun umræðunnar hjá hægrimönnum á Íslandi. Þeir hafa tekið þá stefnu að eltast við það heimskulegasta frá útlöndum, kópera Fox og virðast líta á Glenn Beck sem fyrirmynd.

Andríki hefur hingað til geta státað af heimskulegustu pistlunum um pólitík á Íslandi en nú eru þeir eins og öfgafullir miðjumenn miðað við fuglana hjá AMX. Hver veit, kannski var það markmiðið hjá AMX allan tímann að færa Andríki nær miðjunni.

Ég hef enga trú á því að allir sem standa að AMX séu vitleysingar. Ég held þvert á móti að þeir séu meðvitað að upphefja heimskuna þar sem þeir gera sér grein fyrir því að málstaður þeirra hefur beðið skipbrot. Í stað þess að endurskoða stefnuna og gera upp við fortíðina kjósa þeir að ráðast á allt og alla í þeirri von að skíturinn festist og dugi til að beina athyglinni frá málefnaskorti. Þeir hafa ekki nýjar hugmyndir, einungis valdaþrá og foringjahollustu - gríðarlega mikla foringjahollustu.

Það er ekkert gáfulegt innihald á AMX. Þetta er allt saman heimskulegt. Maður verður vitlausari af því að lesa þessa vefsíðu. Þess vegna vísa ég ekki á síðurnar í þessari færslu, ég vil einfaldlega ekki gera ykkur þann óleik að senda ykkur þangað. Í hvert skipti sem maður slysast til að lesa fuglahvíslið veit maður minna um heiminn en áður. Sem minnir mig á myndband.

Enda er hvergi hægt að gera athugasemdir, hvorki á vefritunum ná á bloggsíðum sem þeim tengjast. Þessir aðilar eru löngu búnir að fatta að þeir geta ekki varið málstaðinn með nokkrum hætti.

Vefsíðan AMX gæti verið tekið beint úr kvikmyndinni Idiocracy. Það er eins og aðstandendur síðunnar voni að fólk verði sífellt heimskara og að endingu verði aftur eftirspurn eftir þeim. Ekki vegna þess að skoðanir þeirra standist rýni heldur vegna þess að fólk verður heppilega heimskt og hætt að rýna í skoðanir.

Ég hvet aðstandendur AMX til að skoða málin betur, klára að gera upp við fortíðina og reyna að koma með nýjar hugmyndir í stað þess að láta eins og heimskir smákrakkar.

Ég held nefnilega að það sé eftirspurn eftir skynsömum hægrimönnum á Íslandi, hægrimönnum sem eru ekki í því að upphefja heimskuna.