Fékk símtal frá bankanum í dag þar sem mér var tilkynnt að það þyrfti að loka kreditkortinu mínu. Ekki vegna óreiðu, ég borga reikninginn alltaf um hver mánaðarmót, heldur voru einhverjir krimmar búnir að afrita kort með númer nálægt mínu og eru víst að dunda sér við að búa til kort í sömu seríu. Hugsanlegt er að þeir fari að misnota kortanúmerið mitt.

- Allt í lagi hugsaði ég, debetkortið verður að duga. Nema hvað, debetkortið rann út í ágúst. Ég nota debetkort semsagt næstum því aldrei. Ég ætlaði að skjótast í bankann fyrir lokun til að sækja kortið sem bíður þar en gleymdi mér í vinnu.

Ég þarf því að stóla á reiðufé um helgina. Frúin verður að skammta seðla og skjótast fyrir mig í ríkið fyrir kvenfélagsfund annað kvöld. Það er hætt við því að ég verði ekki jafn gjafmildur á barnum og oft áður :-)

Nú er kannski stórhætta á því að einhver beri kennsl á mig í bænum annað kvöld og sjái sér hag í að komast yfir seðlaveskið mitt! Þetta var bara grín, ég er aldrei með pening á mér, betla bara á barnum og reyni að húkka mér far heim.