Umræðan um nafnlaus blogg fjallar næstum aldrei um blogg. Yfirleitt er um að ræða spjallborð (málefnin.com og barnaland) eða athugasemdir á bloggsíðum, sérstaklega hjá Agli á Eyjunni og vinsælum mogglingum.

Ég sé ekkert að því að þeir sem halda úti bloggsíðu fjarlægi athugasemdir sem þeir vilja ekki bera ábyrgð á sjálfir. T.d. ef einhver skrifar níð eða hótanir í garð þriðja aðila í nafnlausri athugasemd. Ef þeir fjarlægja þær ekki bera þeir ábyrgð á þeim enda hefðu þeir alveg eins getað skrifað þær sjálfir. Þeir hafa þá þann möguleika að gefa upp ip-tölu ef einhver fer í mál og hugsanlega komið ábyrgðinni á réttan aðila.

Aftur á móti rugla margir þessu saman við ritskoðun, þ.e.a.s. áráttu sumra, sérstaklega mogglinga, við að fjarlægja athugasemdir þeirra sem andmæla þeim og loka alfarið á þá. Þar skiptir nafnleysið engu máli og grimmt er lokað á þá sem skrifa undir fullu nafni.

Björgvin þarf svo að kynna sér Streisand áhrifin. Það vissi varla nokkur um fyllerís og framhjáhaldssögurnar fyrr en hann fór að blaðra.

Ég held að í rauninni séu stjórnmálamenn og auðkýfingar aðallega ósáttir við ótakmarkaða umræðu. Vilja helst geta hringt í ritstjóra og þaggað niður í óþægilegum pennum, t.d. með því að hóta að hætta að kaupa auglýsingar. Hafa enga stjórn á bloggurum.