Auðmenn Íslands eru nær undantekningarlaust skíthælar. Útrásarvíkingarnir eru upp til hópa fávitar. Athafnamenn landsins eru afskaplega margir gjörsamlega siðlausir. Það er algjör undantekning að þetta hyski hafi auðgast á því að gera eitthvað gagnlegt eða búa til verðmæti. Þeir skilja eftir brunarústir. Auðinn fengu þeir með því að skuldsetja aðra. Þeir stálu því sem þeir þykjast eiga, sviku, blekktu, lugu og brutu jafnvel lög. Það skiptir ekki máli, þegar þú getur eytt hundruðum milljóna í að verja þig verður þú aldrei dæmdur.

Engu máli skiptir þó menn séu dæmdir fyrir brot á samkeppnislögum, hver tekur mark á slíku. Samkeppnislög voru bara að þvælast fyrir köppunum.

Siðblinda er ekki gáfa. Það er engin snilligáfa á bak við það að svíkja og pretta. Eitt það versta sem gerðist í góðærinu var að þessi fífl voru sett á stall, upphafin sem snillingar. Fábjánar sem seldu verðbréf þóttu nógu merkilegir til að fá hundrað milljónir á ári en hefðu alveg eins getað verið að selja áskrift að Gestgjafanum með fullri virðingu fyrir þeim sem vinna við það.

Nú flýja flestir skíthælarnir land svo þeir geti haldið áfram að vera ógeðslega ríkir, það dugar þeim ekki að vera bara moldríkir. Þetta hyski mun aldrei fórna krónu af sínu fé til að hjálpa þjóðinni upp úr skítnum sem þeir komu henni í. Þeir munu ekki einu sinni sjá ástæðu til þess, telja sjálfum sér trú um að þeir verðskuldi gullið sem þeir stálu. Halda að þeir hafi verðskuldað bónusana, arðinn og ofurlaunin þó ekkert sé á bak við þetta. Í besta falli voru þetta símasölumenn, í versta falli hreinir og klárir svikahrappar.

Þetta er ekki óhróður um auðmenn, þetta er sannleikur.