Ég geri mér grein fyrir því að jaðaráhrif skatta geta verið neikvæð þegar skattgreiðendur greiða á einhverju stigi hátt hlutfall umframtekna í opinber gjöld, en af hverju finnst mér málflutningur íslenskra repúblikana frekar ósannfærandi í þessari umræðu? Væri ekki betra ef allir borguðu lægri skatt þó á einhverju stigi væru hærri jaðaráhrif en nú? En auðvitað er þessi umræða flókin, miklu flóknari en repúblikanarnir íslensku vilja láta.

Kastljós fjallaði um vefinn Ljósmyndakeppni.is í fyrradag. Meðal mynda sem voru sýndar í þættinum var þessi flugeldamynd. Ég er náttúrulega dálítið stoltur en það hefði samt verið skemmtilega ef ég hefði verið titlaður höfundur myndarinnar en ekki annar meðlimur ljósmyndasíðunnar. Ég nenni samt ekki að pirra mig á því :-)

Eftir síðustu hátíð er þessi mynd orðin sú sem flestir hafa skoðað á flickr síðunni minni, margir sem hafa skoðað hana undanfarið í leit að flugeldamyndum. Fyrir jól var þessi á toppnum. Annars er ég nú ekki að fá margar heimsóknir miðað við sumar hetjurnar á flickr, sérstaklega virðast myndarlegar stúlkur sem eru duglegar við að taka sjálfsmyndir vera vinsælar. Ég held ég feti ekki í fótspor þeirra á næstunni :-)

Ég fór í mína árlegu heimsókn til tannlæknis í hádeginu. Stoppaði stutt eins og vanalega, skoðun og tannsteinn hreinsaður. Ég get fengið vottorð upp á að ég sé með bestu tennurnar í ættinni!

Kom við á hársnyrtistofunni á jarðhæðinni þegar ég kom til baka og lét rýja á mér hausinn. Hársnyrtirinn sem oft hefur snoðað mig áður (ég myndi segja klippt, en það væru ýkjur) bar kennsl á mig sem vantrúarsinna og við ræddum þau mál örstutt. Þó margir haldi eflaust annað þá boða ég ekki vantrúna öllum stundum :-)

Vantrúarhittingur í kvöld, kvenfélagsfundur annað kvöld. Ég verð þreyttur eftir helgi.