Ég klikkaði á verkstjórninni í morgun og endaði því á að skutla stelpunum í skólann. Þær voru alltof lengi af stað og það er náttúrulega engum öðrum en mér að kenna. Ég held þær hafi verið dálítið svekktar að missa af göngunni en um leið ánægðar með skutlið.

Ég var því þokkalega snemma á ferðinni og náði umferðarteppu á Reykjanesbraut og Miklubraut. Ég var ekkert að stressa mig á því, þetta gekk hægt en gekk þó.

Þórður vísaði á nýju plötu I adapt í gær - ég er búinn að renna í gegnum í nokkur skipti og líkar vel. Þetta er alveg á jaðri þess sem ég höndla í rokktónlist - en kemur mér skemmtilega á óvart, ég hélt að I adapt væru leiðinlegri!

b2 vísaði á vantrúargrein gærdagsins þar sem fjallað er um álfa. Það fylgir vísunum frá b2 alltaf heilmikil traffík og yfirleitt kjánalegar/þreytandi athugasemdir - en þær hafa verið í lágmarki í þetta skipti. Svo óheppilega vildi til að netsamband vefþjóns var slitrótt í tímabili í gærkvöldi en það er komið í lag.