Ég braut tönn í föstudagsboltanum fyrir hádegi. Það var ekkert sérstakt!

Ekki get ég sagt að þetta hafi gerst í miklum hamagangi, ég fékk ekki olnboga í andlitið og hljóp ekki á markstöng. Fékk frekar saklausan háan bolta og tókst á einhvern undarlegan hátt að láta tuðruna skoppa á gólfinu og þaðan undir hökuna. Kvarnaði úr annarri framtönn ágætis stykki. Frekar furðuleg tilfinning að tína glerung úr munninum á sér.

Ég hringdi í Hannes tannlækni strax eftir boltann og komst beint í stólinn þannig að tæpum klukkutíma eftir að ég hafði brotið tönnina var ég búinn að láta laga hana (eða uh, plasta þetta).

Hér er mynd af trantinum á mér eftir viðgerð, smellið til að sjá nærmynd af tönnum (ég veit, einstaklega áhugavert) :-) Ég er aðallega svekktur að hafa ekki verið með myndavél á mér, svo ég gæti tekið mynd af brotinu.

Þess má geta að ég á pantaðan tíma hjá Hannesi tannlækni á mánudag, þá fer fram árleg tannsteinshreinsun.

Þess má einnig geta að ég hef aldrei fengið tannskemmd. Svona ef þið ætlið að gagnrýna á mér tennurnar :-)