Henson 2 - 2 FC Dragon

oooohhhhhhhh, andskotinn

Leikurinn var spilaður á Framvelli klukkan níu í kvöld. Fínar aðstæður, raki í lofti, létt gola og þokkalega hlýtt.

Mætingin hjá Henson var frekar slök, mættum þrettán. Vorum því með tvo skiptimenn. Ég stillti þessu varfærnislega upp enda Dragon með sterkt lið, voru búnir að vinna alla sína fimm leiki í riðlinum og höfðu aðeins fengið á sig eitt mark. Okkur vantaði sterka menn, Pétur komst ekki en hann hefur verið ansi öflugur á miðjunni og Orri komst ekki heldur, Gunni var meiddur og fleiri létu sig vanta. Eins og ég sagði stillti ég þessu varfærnislega upp, spiluðum 4-5-1 með Jóhann Fjalar frammi. Hans fyrsti leikur með okkur. Planið var að spila aftarlega, loka svæðum og nýta skyndisóknir.

Dragon eru sprækir, pressuðu framarlega og keyrðu vel allan tímann, enda með fjölda manns á bekknum. Meðalaldur þeirra er eflaust svona 22-23 ár, ætli meðalaldur Henson sé ekki svona 28-30 ár. Eflaust munar meiru a meðalþyngd leikmanna í kílóum talið :-)

Hvað um það, leikplanið gekk stórkostlega í fyrri hálfleik, þeir voru meira með boltann en sköpuðu ekki mörg hættuleg færi. Við fengum nokkrar skyndisóknir og í einni þeirar, eftir svona fimmtán, tuttugu mínútur sótti Daði upp miðjuna, gaf boltann á Kjartan vinstra megin. Jói átti gott hlaup í gegnum vörnina vinstra megin og dró með sér tvo varnarmenn, opnaði þar allt fyrir Daða sem fékk góða sendingu frá Kjartani og afgreiddi boltann vel. Markvörðurinn var í boltanum en varði hann inn. Þegar um fimm til tíu mínútur voru eftir af hálfleiknum gaf Óli boltann á Jóa sem lék upp að teig hægra megin og lagði þar fyrir á Lárus sem kom aðvífandi fyrir miðjan teig og skoraði með góðu viðstöðulausu skoti með vinstri fæti. 2-0 fyrir okkur í hálfleik og allt að ganga upp.

Í seinni hálfleik fór að bera á þreytu hjá okkur. Fyrri helming hálfleiksins gekk þetta ágætlega, þeir áttu einhver færi en náðu ekki að skora. Þegar um átján mínútur voru eftir minnkuðu þeir muninn, sóttu upp hægra megin, lögðu boltann fyrir markið, ég renndi mér í boltann ásamt sóknarmanni, boltinn barst út í teig þar sem einn þeirra kom og nelgdi í markið.

Þeir sóttu svo áfram, við orðnir verulega þreyttir. Þegar þarna var komið við sögu vorum við bara með einn skiptimann. Daði, sem hafði verið helvíti öflugur á miðjunni, meiddist í kálfa. Þeir sóttu og áttu einhver dauðafæri auk skots í slá sem var samt ekki jafn hættuleg og það hljómar.

Þegar ein mínúta var eftir af leiknum fengu þeir aukaspyrnu rétt fyrir innan miðjuhringinn á okkar vallarhelmingi. Þeir hrúguðu mönnum inn í teig, spyrnan var misheppnuð, lár boltinn beint á teiginn, en fjandinn hafi það, tuðran skoppaði fram hjá fjórum eða fimm leikmönnum Henson áður en sóknarmaður þeirra náði honum við fjærstöngina og setti hann inn. Hrikalegt mark og minnir svo sannarlega á tragedíuna á lokamínútu viðureignarinnnar við Kóngana.

Við töpuðum semsagt tveimur stigum á síðustu mínútu leiksins, hræðilega svekkjandi. Fyrir leikinn hefði ég alveg sætt mig við eitt stig úr þessum leik, en miðað við fyrri hálfleikinn er þetta náttúrulega agalega svekkjandi og það er sorglegt að klúðra aftur leik á lokamínútunni.

Dragon er með gott lið, fullt af ungum strákum í fínu formi. Ljóshærður miðjumaður var þeirra besti leikmaður, hélt bolta vel og ógnaði sífellt.

Leikurinn var nokkuð drengilega leikinn, þeir áttu samt nokkur vafasöm brot en góður dómari leiksins hélt þeim á mottunni, veifaði spjaldinu þegar það átti við. Hefði samt mátt sleppa því að spjalda sóknarmann þeirra þegar hann tók boltann með hendinni, óþarfi að veifa því gula fyrir slík atriði í þessari deild. Ég er nokkuð ánægður með það hve lítið leikmenn Henson tuðuðu í leiknum.

Menn voru að spila þetta nokkuð vel, fyrir utan síðustu fimmtán mínúturnar, en þá var þrekleysi farið að segja til sín. Svekkjandi að mæta með svona lítinn hóp í þennan leik, höfum haft fimm, sex skiptimenn í öllum leikjum hingað til. Við getum samt verið stoltir af þessu, mættum besta liði riðilsins og hefðum átt að vinna. Jóhann Fjalar kom sprækur inn, akkúrat það sem okkur vantaði, ungur og snöggur framherji sem getur tekið menn á.

Ég spilaði um hálfan leikinn, hefði ekki spilað svona mikið ef Daði hefði ekki meiðst. Átti ágætar rispur en missti boltann samt of oft eftir að hafa gert ágæta hluti. Í svona leikjum skiptir miklu máli að halda boltan innan liðsins og að vissu leyti gekk það ekki nógu vel síðustu tuttugu mínúturnar.