Henson 2 - 1 Nings

Jæja, þá er utandeildin hafin hjá Henson. Við frestuðum leiknum í fyrstu umferð þar sem hann var settur á sama tíma og úrslitaleikur Meistaradeildar. Sá leikur fer fram miðvikudaginn áttunda júni. Þessi leikur var semsagt hluti af annarri umferð.

Leikurinn í kvöld var á Framvelli og aðstæður voru eins og best verður kosið. Sól og blíða. Framvöllurinn er helvíti fínn þó gúmmíið sé enn ansi mikið á vellinum.

Mæting var góð, 17 leikmenn mættir þannig að það vær hægt að spila leikinn á þokkalegu tempói, ólíkt æfingaleikjunum síðustu þar sem engir skiptimenn hafa mætt. Hópurinn er náttúrulega ansi stór hjá okkur þetta sumarið.

Við stilltum þessu varfærnislega upp, ég og Maggi vorum á hliðarlínunni og stjórnuðum. Maggi meiddist á hné um daginn og verður ekkert með í sumar, ég tognaði á læri og þarf a.m.k. viku í viðbóð. Byrjuðum með uppstllinguna 4-5-1 þar sem við vildum átta okkur á aðstæðum og ná tökum á miðjunni.

Það leikplan gekk ekki alveg upp, pressan á Nings var of lítil, við vörðumst of aftarlega og þeir héldu boltanum auðveldlega á eigin vallarhelmingi. Lítill broddur var þó í sókninni hjá þeim og þetta var frekar jafnt til að byrja með. Þeir áttu þó nokkrar sóknir og sköpuðu sér færi. Um miðjan hálfleikinn skoruðu þeir svo mark eftir frekar slaka varnarvinnu og hefðu hæglega getað bætt við mörkum í hálfleiknum, fengu m.a. dauðafæri eftir hroðaleg varnarmistök. Helstu færi Henson í hálfleiknum komu úr föstum leikatriðum, m.a. vörðu þeir einu sinni á línu og Kjartan skaut yfir úr góðu færi.

Í seinni hálfleik skiptum við yfir í 4-4-2 og náðum strax ágætum tökum á leiknum, héldum boltanum betur og ógnuðum nokkuð. Fengum færi og Kjartan komst einn í gegn eftir góða sendingu, kláraði það færi afar vel. Kjartan var svo aftur á ferðinni skömmu síðar, skoraði þá með hægri mér til mikillar furðu. Á þessu tímabili stjórnuðum við leiknum og ég átti von á að við myndum jafnvel bæta við mörkum. En þegar um korter var eftir var Kjartan að leika upp hægri kantinn, einn leikmaður Nings braut gróflega á honun, Kjartan tók því eitthvað illa og reyndi að slá til hans. þau tilþrif voru reyndar ansi aumingjaleg en nógu mikil þó til að dómarinn vék honum af velli. Við spiluðum því síðustu fimmtán mínúturnar einum manni færri. Nings náði frumkvæði en með mikilli baráttu og keyrslu héldum við sigrinum. Ég og Maggi vorum grimmir á hliðalínunni og skiptum mönnum útaf af miklum móð.

Nings áttu tvö sláarskot en sem betur fer náðu þeir ekki að koma tuðrunni í netið.

Góður sigur hjá Henson í fyrsta leik, menn voru náttúrulega frekar stífir og utangátta til að byrja með enda lítið verið spilað, Nings eru í mun betri leikæfingu, hafa tekið miklu fleiri æfingaleiki. Henson er með stóran hóp og getur spilað þetta á góðu tempói.

Þetta eru fín úrslit, getum bætt ýmislegt og það er helvíti gott að taka þetta á baráttunni og þrekinu - við hefðum aldrei unnið leikinn ef við hefðum ekki geta skipt svona ört - þetta var sigur liðsheildarinnar.

Ég held samt að það hafi verið stjórarnir á hliðarlínunni sem gerðu útslagið í kvöld enda enginn í sambærilegu hlutverki hjá Nings :-P