Stelpurnar voru í ólíku skapi í morgun. Kolla var hress og kát, spennt að fara í leikskólann - Inga María var stúrin og vildi ekki sleppa mér í leikskólanum.

Sem betur fer eru búningarnir búnir til í leikskólanum þannig að við þurfum ekki að vesenast í því. Ég er afar ánægður með þetta fyrirkomulag, vikurnar fyrir öskudag eru krakkarnir að dunda sér við að gera búninga eftir eigin höfði. Kolla ætlar að vera köttur, Inga María ákvað að vera trúður.

Nóttin var afar erfið, Inga María kom upp í og var óróleg. Kolla kom líka upp í um miðja nótt en gafst upp og fór aftur í rúmið sitt. Inga María vaknaði svo hágrátandi klukkan hálf átta - fúl yfir því að móðir hennar væri farin. Lítið sem ég gat gert, hún sofnaði aftur og ég náði að blunda í korter.

Ég er afar syfjaður, ætla að rölta út í Nettó og kaupa Magic. Vonandi er ekki allt fullt af syngjandi börnum að betla nammi. Þetta kallast óraunsæ óskhyggja.

Hvernig stendur á því að það er frí í grunnskólum á þessum degi? Eru einhverjir aðrir í fríi? Skil þetta ekki.

Öskurdagur er réttnefni.