Við hjónin fórum út að borða með litlum fyrirvara í gærkvöldi og enduðum á Galileó.

Þetta var stutt stopp hjá okkur, þannig að við slepptum forrétt. Ég fékk mér Kjúklingarisotto með aspas, trufflukeim og parmesan (2150.- kr) og Gyða fékk sér Tagliatelle með humar, tómatbitum, hvítlauk og steinselju (2680.- kr). Báðir réttirnir voru góðir, rísottóið var með fullt af kjúlking og humarinn var ekkert sparaður í réttinum hennar Gyðu. Með þessu drukkum við flösku af Frascati hvítvíni (3190.- kr), ágætt en dálítið þungt fyrir minn smekk, ég er hrifnari af léttari hvítvínum. Ég ákvað að fá mér risotto fyrst ég prófaði að elda það um daginn, risottotið þeirra er betra en mitt :-)

Gyða fékk sér heita súkkulaðiköku (1050.- kr) í desert en ég lét einfaldan malt whisky duga. Þjónustan var góð en við biðum frekar lengi eftir kökunni, vorum örlítið pirruð á að bíða þar sem við vorum á leiðinni í teiti.

Borðið okkar var rétt við innganginn niðri, sakaði ekki nema þegar stórir hópar komu inn því þá voru báðar hurðirnar opnar og kaldur vindurinn kom inn. Neðsta hæðin er reyklaus sem er til fyrirmyndar. Mjög þægilegt að sleppa algjörlega við óbeinar reykingar þegar maður vill njóta matarins..

Reikningur kvöldsins 9070.- kr, það gleymdist að rukka fyrir whiskyið sé ég þegar ég skoða strimilinn.