Henson 3 - 3 Kókóbomban

Leikurinn fór fram á gervigrasinu í Laugardal klukkan átta í kvöld í fínu veðri. Ég byrjaði leikinn í framlínu eftir ágæta frammistöðu í síðasta leik og skoraði glæsilegt mark í kvöld.

Kókóbomban byrjaði leikinn af krafti og voru sterkara liðið fyrstu 10 mínúturnar. Eitthvað óöryggi hjá Hensons. Eftir um 10-15 mínútna leik sótti Henson. Ég fékk boltann, lagði hann á Kjartan sem lék á vinstri kant, fékk boltann aftur, lagði hann aftur á Kjartan sem var kominn á góða siglingu einn í gegn. Hann fór upp að teig og skaut að marki, markvörður Kókóbombunnar varði en hélt boltanum ekki og Alli fylgdi vel á eftir og skoraði. Þetta var fyrsta alvöru sókn okkar í leiknum og Kókóbombumenn voru ekki alveg að höndla þetta, urðu nú frekar stressaðir. Eftir þetta vorum við mun sterkari og sóttum stíft. Meðal annars gaf ég ágæta sendingu á fjærstöng þar sem Alli kom en skaut framhjá í góðu færi.

Þegar fimmtán mínútur voru eftir af hálfleiknum skoraði ég annað mark Henson. Fékk boltann nokkrar metra fyrir framan vítateiginn vinstra megin, lék á 3-4 varnarmenn og lagði boltann framhjá markmanninum. Glæsilegt mark svo ég segi bara alveg eins og er af minni alkunnu hógværð.

Á þessari stundu var bara eitt lið á vellinum, við vorum gjörsamlega að yfirspila Kókóbombuna. En eitthvað er að í herbúðum Hensons.

Upp úr engu skoraði Kókóbomban. Boltinn kom fram völlinn og lítil hætta var á ferðum, Snorri klikkaði á því að hreinsa boltann, gaf hann beint í fætur Kókóbombumanna við miðjan völlinn, sem þökkuðu pent fyrir sig, léku upp völlinn og minnkuðu muninn.

Áður en hálfleikurinn var liðinn höfðu þeir svo jafnað leikinn eftir ágætis sókn.

Enn sótti Henson í fyrri hálfleik og það verður að teljast kraftaverk að við skulum ekki hafa skorað. Ég skipti útaf fyrir Odda sem kom sterkur inn og lék í gegn, lagði boltann á Snæbjörn sem var einn fyrir opnu marki, einungis varnarmaður stóð á marklínu, markvörður var víðs fjarri. Snæbbi skaut viðstöðulaust en varnarmaðurinn á línunni varði með hendi. Þetta sáu allir nema dómarinn. Ótrúlegt að dæma ekki víti og senda mannin útaf. Algjörlega út í hött.

2-2 í hálfleik.

Henson hélt áfram að sækja í síðari hálfleik en skapaði sér þó ekki jafn góð færi. Vorum þó mun meira með boltann og skoruðum að lokum, Oddi fékk góða sendingu í gegn og kláraði vel en dómarinn dæmdi rangstöðu. Enn og aftur rangur dómur. Ég kom aftur inná þegar um 10 mínútur voru liðnar af hálfleiknum.

Það þurfti svo ekki að spyrja að því, Kókóbomban fékk aukaspyrnu nokkra metra fyrir framan vítateig Henson og annan leikinn í röð fengum við á okkur glæsilegt mark úr aukaspyrnu, algjörlega óverjandi.

Var nú allt kapp lagt í sóknina og Alli fékk meðal annars ákjósanlegt færi eftir góða sendingu en skallaði framhjá. Við uppskárum jöfnunarmark að lokum, Kjartan sem átti góðan leik í kvöld fékk boltann vinstra meginn í teignum, lék upp að endalínu og lagði fyrir þar sem Alli skoraði með ágætu marki. Kókóbombumenn vildu rangstæðu en það var fáránlegt væl. Kjartan var kominn upp að endalínu þegar hann lagði boltann fyrir auk þess sem a.m.k. þrír leikmenn voru fyrir innnan. Menn eru einfaldlega ekki rangstæðir þegar sóknarmaður gefur boltann frá marki andstæðinganna.

Ekki tókst okkur að ná fram sigri í dag en það er þó ágætis framfaraskref að hafa jafnað leikinn eftir að hafa lent undir.

Úrslit leiksins eru ósanngjörn en þannig er boltinn, leikurinn hefði átt að fara svona 7-3 fyrir Henson miðað við færin. Ennþá situr Henson á botni A riðils sem er fáránlegt miðað við getu liðsins og hvernig við höfum spilað. Nú verða menn að taka sig á og landa sigrum í næstum leikjum, við höfum verið mun betri en andstæðingar okkar í síðustu leikjun án þess að uppskera.