Hóf daginn í ræktinni, tók fætur í dag. Held að æfingin hljóti að teljast ágæt þar sem ég átti erfitt með að standa og míga í hlandskál áður en ég fór í sturtu. Leti olli því að ég nennti ekki að skokka í tuttugu mínútur eftir æfingu, hætti á sjöundu mínútu. Leti er böl.

Tók strætó frá Grensás á Hlemm, beið þar eftir vagni niður Hverfisgötuna. Nennti ekki að labba laugaveginn í skítakulda. Leti er böl.

Fyrir framan Hlemm stóðu rónar og reyktu. Lalli Johns, frægasti aumingi landsins var greinilega aðalmaðurinn. Ég sat inni og skoðaði rónana í gegnum glerið, fiskabúr á röngunni. Djöfull er þetta lið lifað í framan, eflaust fimmtán árum yngri en þau líta út fyrir að vera. Öl er böl ef maður er róni. Ég ætla að detta í það á föstudaginn í næstu viku.

Var mættur í vinnu kortér yfir ellefu. Ekki vantar verkefnin, fjórir dagar til stefnu. Spilaði fussball fyrir hádegismat, átti stórleik. Fín súpa og pæ í matinn. Góður hádegismatur, sátum óvenjulega lengi og kjöftuðum. Það er vanmetin iðja, að sitja og kjafta við vinnufélagana í hádeginu.