Áðan urðum við vitni að árekstri.

Við vorum á leiðinni í Mjódd vorum að koma úr Smáralind, biðum á beygjuljósum á Breiðholstbraut. Mér varð litið á Benz bifreið sem beið á rauðu á Skógarseli, sá að maðurinní bílnum var að kveikja sér í sígarettu. Af einhverri ástæðu tek ég oft eftir slíku. Hann var einn í bílnum.

Það var grænt ljóst á Breiðholtsbraut, rautt á beygjuljósunum sem ég beið á og líka á umferðina frá Skógarseli og Stekkjarbakka.

Þar sem ég sat og horfði á þennan mann ók hann allt í einu af stað yfir gatnamótin. Það fór ekki á milli mála að hann var að fara yfir á rauðu enda grænt ljós fyrir framan mig.

Tíminn leið furðuhægt. Ég held samt að það sé misskilngur að tíminn líði rosalega hægt þegar fólk lendi í bílslysi, þó ég viti svosem ekkert um það enda aldrei lent í árekstri.

Jeppi með hestakerru kom að gatnamótunum, flautan gall - benzinn stoppaði þegar hann fattaði að eitthvað var ekki eins og það átti að vera. Bremsuvegalengd jeppa með kerru í eftirdragi er löng, jeppinn rann einhverja tugi metra þar til hann skall á hliðinni bílstjóramegin.

Ástæðan fyrir því að manni finnst tíminn líða hægt er að þetta tekur furðulega langan tíma, ef jeppinn hefði verið á hundrað km hraða eða verið kominn nær gatnamótunum þegar bíllinn ók í veg fyrir hann hefði tíminn ekkert liðið hægt. Áreksturinn hefði einfaldlega gerst á augabragði. En jeppinn ók ekki mjög hratt og var einhverja tugi metra í burtu. Því tók þetta nokkrar sekúndur, á tímabili hélt ég meira að segja að jeppinn myndi ná að stoppa en það rættist ekki.

Fólk í nálægum bílum fór og stumraði yfir ökumanni Benz bifreiðarinnar. Sem betur fer var áreksturinn ekki jafn harður og fyrst leit út fyrir. Bílarnir báðir nokkuð illa farnir en jeppinn hafði náð að draga ansi mikið úr hraðanum. Ef hann hefði verið kominn að gatnamótunum þegar Benzinn ók út á þau held ég þarna hefði orðið banaslys. Sem betur fer var ekki hestur í hestakerrunni.

Bílstjórinn utangátta fór úr Benzinum farþegamegin, ennþá með sígarettuna í kjaftinum.

Það var nú gott að hann missti hana ekki.

Þetta atvik minnti mig enn og aftur á þá staðreynd að engu máli skiptir hversu vel ég ek, alltaf er hætta á því að einhverjir utangátta sauðir aki í veg fyrir mig, yfir á öfugan vegahelming eða aftan á mig. Alltaf er hætta á að ég sé þessi utangátta sauður.

Spurning um að velta því fyrir sér næst þegar maður les frétt um banaslys í umferðinni. Oft eru þar fólk að láta lífið sem ekki gerði nein mistök, varð bara í vegi samborgara sem var utangátta vegna þess að hann var upptekinn við að kveikja sér í sígarettu.