Eftirrétturinn í kvöld er svo súkkulaðikaka. Alvöru súkkulaðikaka. Hér er uppskriftin sem ég sá í stóru bókinni hennar Nönnu sem mamma og pabbi eiga. Þetta er ekki megrunarfæði :-)

550g dökkt súkkulaði 175g ósaltað smjör 175g sykur 6 egg aðskilin 2 tsk vanillu essens (mega vera vanilludropar) 150ml ljóst sýróp 150ml rjómi

Ofn hitaður í 180°.
300gr súkkulaði sett í pott ásamt smjörinu og brætt við vægan hita og síðan tekið af hitanum og látið kólna nokkuð. Hrært oft á meðan blandan er að kólna.

Eggjarauður þeyttar mjög vel með helming af sykrinum og síðan er súkkulaðiblöndunni hrært saman við með sleikju ásamt vanilluessens.

Eggjahvítur þeyttar þar til þær eru hálfstífar, afgangnum af sykrinum blandað saman við smátt og smátt, þeytt þar til hvíturnar mynda stífa toppa. Blandað gætilega saman við deigið með sleikju.

Hellt í smurt og pappírsklætt kökuform og bakað í u.þ.b. 45 mín eða þar til kakan hefur lyft sér vel og prjónn sem stungið er í hana miðja kemur nærri hreinn út.

Þá er kakan tekin út og kæld á grind en ekki tekin úr forminu fyrr en hún er orðin köld. Hún fellur í miðjunni en það er eðlilegt.

Sýróp og rjómi sett í pott, hitað að suðu og hrært vel. Tekið af hitanum, afgangnum af súkkulanu skorið í smá bita og blandað saman við. Hrært þar til súkkulaðið er bráðið. Kreminu hellt á kökuna og hún kæld þar kremið er orðið stíft.