Veitingastaðurinn Pisa Lækjargötu

Kolla vildi fá eitthvað með blönduðu sjávarfangi í kvöldmatinn og okkur datt í hug sjávarréttapasta. Ég var búinn að heyra af nýjum ítölskum stað á Lækjargötu og við stefndum því þangað. Reyndum að skoða heimasíðuna áður en við fórum en af einhverjum ástæðum gekk það ekki þá en virkar núna.

Pisa er semsagt nýr ítalskur staður í Lækjargötu, þar sem Ljóti andarunginn var áður.

Fyrir mat fengum við focaccia brauð og heimalagað ólfíumauk á borðið. Focaccia brauðið var sérlega gott, ekkert ósvipað því sem ég geri, bara betra. Maukið var líka ansi gott. Ég þarf að prófa að búa til ólífumauk fyrir næsta afmælisboð. Við pöntuðum tvo forrétti, carpaccio og bruchetta með kjúklingalifrar mousse. Carpaccio var gott, bruchettan frábær.

Kolla fékk spaghetti með hvítlauk, steiktum skelfisk, chili og tómat í aðalrétt og var afar sátt. Fengum milda útgáfu handa henni fyrst rétturinn var með chili. Inga María pantaði pizzu margherita eins og alltaf. Hún var ánægð en næst ætlar hún að fá sér spagettí með kjötbollum, var dálítið dugleg að narta í spagettí hjá systur sinni. Áróra fékk sér fiskisúpu með saffron, tómat og kryddjurtum, full af hvítlauks steiktum skelfisk.

Gyða var afar ánægð með Steikt sítrónu og rósmarín krydduð kjúklingalæri með sveppa ragout.

Ég pantaði að sjálfsögðu risotto fyrst það var á matseðlinum! Risotto með andalæri confit, grænum pipar og skarlottulauk er besta risotto sem ég hef fengið á veitingastað hér á landi. Oft hef ég fengið gott risotto en alltaf hugsað að ég gæti gert jafn gott. Ekki í kvöld! Grænu piparkornin komu skemmtilega á óvart.

Þjónustan var óaðfinnanleg, bætt á vatnsglas hjá mér allt kvöldið.

Ég er semsagt afar sáttur eftir þessa heimsókn og mun kíkja aftur á Pisa bráðlega.

06.01.09 23:30 | (1) | veitingahús

Fyrir hverja er lögreglan?

Eva skrifar um lögregluna.

Þegar maður stendur mikið í því að berjast gegn valdastofnunum og fyrirtækjum, áttar maður sig smámsaman á því að megintilgangur lögreglunnar er ekki sá að vernda óbreytta borgara, heldur að tryggja völd fámennra hópa.

Ég veit ekki hvort ég er algjörlega sammála Evu en get þó vottað að lögreglan hefur meiri áhuga á smáglæpamönnum þegar þeir ræna frá bönkum heldur en þegar þeir brjótast inn á heimili fólks. Sjálfum finnst mér að það ætti að vera akkúrat öfugt.

06.01.09 11:45 | (0) | vísanir

Kolla níu ára

Kolla er níu ára í dag.

Hún fékk enga afmælisgjöf í morgun, á eftir að velja hana. Það er ekki mjög auðvelt í þetta skipti þar sem hún fékk allt sem var á óskalistanum í jólagjöf.

Förum út að borða í kvöld, Kolla sér um að velja veitingastaðinn. Afmælisboðin verða næsta sunnudag.

06.01.09 08:45 | (3) | fjölskyldan

"án allra leiðinda"

Þegar fólki finnst ástæða að taka fram að skrif séu "bara svona án allra leiðinda" er það yfirleitt vegna þess að skrifin eru ekki án leiðinda heldur sett fram í pirringi og með nokkrum stælum.

05.01.09 21:00 | (2) | dylgjublogg

Trúmálarökræða

Ég er reyna að rökræða við Árni B. Steinarsson Norðfjörð um ríkiskirkjuna, siðrænan húmanisma og annað trúmálatengt. Þetta er að mínu mati dálítið forvitnileg umræða. Árni á erfitt með að sjá hvort eitthvað getur komið í stað fyrir Þjóðkirkjuna. Ég tel svo vera en umræðan snýst núna fyrst og fremst um það hvort siðrænn húmanismi sé trúarbrögð vegna þess að það séu fúndamental trúleysingjar, hvort líf án hindurvitna sé "boring" og hvort sálfræðingar og geðlæknar eigi frekar að sinna sálgæslu sem prestar og djáknar sjá um í dag.

Verst að Árni birtir ekki athugasemdir beint heldur þarf að bíða eftir samþykki hans. Ég veit því aldrei hvort næsta athugasemd mín mun birtast. Áður hefur hann sleppt því að birta athugasemdir mínar (sem virðist lenska á moggabloggi trúmanna).

05.01.09 17:30 | (3) | efahyggja

Ljósmynd tekin á 6 mánuðum

Telegraph fjallar um ljósmynd sem var tekin á sex mánuðum og sýnir gang sólar frá vetrarsólstöðum að sumarsólstöðum. Magnað hreint út sagt.

Hér er sýnt hvernig myndin var tekin.

(via ljósmyndakeppni.is)

05.01.09 13:15 | (2) | vísanir

Pistill um frekjudollur

Ég skrifa smá pistil á Vantrú í dag um væntanlegt Menningarhús í Mosfellsbæ. Skrifa um það í kjölfar prédikunar kristinnar frekjudollu sem ekki getur hugsað sér að deila húsnæði með öðrum, að hans mati geta kristnir einungis farið með bænir í húsnæði sem þeir eiga alveg sjálfir!

...trúaður maður á auðveldara með að biðjast fyrir í einrúmi án nokkurs sérstaks rýmis heldur en í alrými allra trúarbragða, Það gefur svona álíka mikinn frið í sálina eins og að vera ástfanginn í öllum konum í einu. #

05.01.09 09:30 | (0) | vísanir

Heilarar láta til sín taka

Sjúkk, heilararnir eru mættir á svæðið samkvæmt frétt á bls. 11 í Fréttablaðinu í dag. Þeir mega þó eiga það að þjónustan er ókeypis þessa dagana vegna kreppunnar. Verst að þjónustan er ekki alltaf ókeypis því þetta er augljóslega bölvað bull. Svik og prettir.

Ég veit ekki hvort fjarheilun er inni í þessum pakka. Einu sinni fékk ég þá hugmynd að stofna smáskammtafjarheilunarþjónustu og græða á auðtrúa fólki. Ég myndi þá gera alveg rosalega lítið af engu úr fjarska og þiggja greiðslur fyrir - samt engar smáskammtagreiðslur.

Ég ætti kannski að láta verða af því. Þetta er ekkert miklu vitlausara en margar hugmyndir sem hafa orðið að alvöru rekstri, t.d. blómadropar. Verst að siðferðið er eitthvað að þvælast fyrir mér.

Hér er fróðleg innsýn í hugarheim heilara.

Þegar þú leggur hendur yfir sjúkling í þeirri von að til verði snögg breyting eða fullkomnun/kraftaverk á sjúklingi þá verður slíkt aðeins til þegar heilunarmiðill hefur náð fullkomnun yfir yfirskynlegum mætti sem tengir hann við orku almættisins.

Guðleg orka getur ekki flætt um tengil sem ekki er hreinn í sálinni því að það væri eins og að gera tilraun til að kveikja ljós á ljósastæði þar sem engin pera væri til staðar til að gefa birtuna.

05.01.09 08:30 | (2) | efahyggja

Samræða um gildi og grunn samfélagsins

Á hátíðisstundum kemur fyrir að talsmenn ríkiskirkjunnar gaspra um nauðsyn umræðu. Þeir tala um samræðu milli hópa, að ólík sjónarmið skuli sett fram, nú sé tími opinberrar umræðu og uppgjörs, efla þurfi samfélagsrýni, efna til samræðu um gildi og grunn og ræða hverslags samfélag við viljum.

Meira...

05.01.09 00:00 | (0) | kristni | pólitík

Gáfuleg athugasemd frá Henrý Þór

Ég get ekki tekið Matthías Ásgeirsson alvarlega. Hökti alltaf af flissi þegar ég hugsa til þess að nafnið hans þýðir „gjöf frá guði.“ Flisss.. #

Hvað get ég sagt? Myndi Henrý Þór taka mig alvarlega ef ég skipti um nafn?

Annars sé ég athugasemdir í þessum dúr af og til frá ~~tröllheimskum trúarnötturum~~ misskörpum trúmönnum. Get ekki annað en dæst. Þetta er svo tilgangslaust og fíflalegt.

Nafnið hef ég frá afa á Sigló. Held að hann hafi verið vita trúlaus.

04.01.09 20:30 | (13) | Ýmislegt